Lajmet

Në ambientet e Ministrisë së Kulturës, sot, më 15 korrik 2024, VAPIK dhe përdoruesit e të drejtave të autorëve, operatorët kabllorë IPKO Telecommunications, Artmotion, Kujtesa Net, Telkos, ISP Broadcast dhe Optimum Telecommunications, kanë nënshkruar marrëveshje për zbatimin e pagesës së tarifave të ritransmetimit siç është rregulluar me vendimin e datës 19.10.2020, me efektivitet nga data 1 prill 2021 e deri më 31.12.2024, dhe në bazë të Ligjit për të Drejtat e Autorit dhe të Drejtat e Përafërta.

Marrëveshja është nënshkruar nga Lirak Çelaj, drejtor menaxhues dhe përfaqësuesit e operatorëve të lartcekur. Marrëveshja është nënshkruar në prezencë të përfaqësuesve të MKRS dhe të KPM të cilët ishin angazhuar në ndërmjetësimin mes VAPIK dhe Operatorëve kabllorë me qëllim zbatimin e Ligjit për të Drejtat e Autorit të cilët poashtu kanë marr garanci që Ligji dhe Marrëveshja do të zbatohet plotësisht nga të dyja palët.

Kjo marrëveshje shënon një hap të rëndësishëm në menaxhimit kolektiv sa i përket të Drejtave të Autorit Audiovizuel e cila siguron pagesën e tarifave të akumuluara që nga viti 2021, përcaktimin e tarifave të zbritura për vitet 2025-2028, tërheqjen e padive nga VAPIK dhe operatorët kabllorë, përcaktimin e tarifave të reja për vitin 2029 me marrëveshje sipas ligjit në fuqi, dhe luftimin e piraterisë dhe informalitetit në treg nga të gjitha palët nënshkruese.