Lajmet

Më 5 gusht 2025 në Prishtinë, VAPIK realizoi me sukses transferin e parë bankar drejt bartësve të të Drejtave të Autorit në fushën audiovizuale—një hap i shumëpritur që shënon fillimin e një epoke të re për krijuesit e artit dhe kulturës në vend.
Ky moment historik u kremtua në një ceremoni solemne dhe të ngrohtë, ku u mblodhën figura të rëndësishme nga komuniteti artistik dhe institucional: autorë, interpretues, producentë, përfaqësues të operatorëve kabllorë dhe televizioneve, si dhe përfaqësues nga institucionet relevante. Të pranishëm ishin Ministri i Kulturës në detyrë, z. Hajrullah Çeku, ish-ministrja e Kulturës znj. Vlora Dumoshi dhe ish-ministri z. Memli Krasniqi, të cilët kanë luajtur role kyçe në mbështetjen e kësaj të drejte.
Ceremonin e hapi z. Lirak Çelaj i cili përshkroi procesin e arritjes së marrëveshjes mes VAPIK dhe operatorëve kabllorë në korrik të vitit 2024 hap ky që shënoi kthesë vendimtare në këtë proces.
Në vazhdim të pranishmëve ju drejtua edhe z. Blerim Gjoci i cili në fjalën e tij përshëndetëse, theksoi rëndësinë e këtij hapi si një akt jo vetëm ligjor, por edhe moral, që rikthen dinjitetin dhe vlerësimin për punën e palodhur të krijuesve audiovizualë. “Ky është një moment që na kujton se arti nuk është vetëm pasion, por edhe profesion që meriton shpërblim të drejtë,” u shpreh ai.
VAPIK ndau mirënjohje të veçanta për secilin prej kontribuuesve, duke falënderuar për angazhimin e tyre të vazhdueshëm në mbrojtjen dhe avancimin e të drejtave të autorit. Kulmi i ceremonisë ishte dorëzimi solemn i dëshmisë së transferit bankar të parë nga z. Hajrullah Çeku për z. Naser Rafuna—producent, autor dhe aktor i njohur—duke simbolizuar fillimin konkret të shpërblimit për krijimtarinë audiovizuale.
Ky akt shënon jo vetëm një arritje institucionale për VAPIK-un, por edhe një fitore për të gjithë komunitetin krijues, duke vendosur një precedent të rëndësishëm për të ardhmen e të drejtave të autorit në Kosovë.